Dreißiger-Abschnitt 42

[Zu Dreißiger 41]

42,1      aht vanen sweimen gein der stat,       
42,2      die er balde wenden bat
42,3      Den küenen sigelôsen man.
42,4      dar nâch gebôt er im sân
42,5      daz er kêrte nâch im în.
42,6      daz tet er: wan ez solt et sîn.
42,7         Gaschier sîn kumn ouch niht verbirt;
42,8      an dem innen wart der wirt
42,9      daz sîn gast was komen ûz.
42,10      daz er niht îsen als ein strûz
42,11      und starke vlinse verslant,
42,12      daz machte daz err niht envant.
42,13      sîn zorn begunde limmen
42,14      und als ein lewe brimmen.
42,15      brach er ûz sîn eigen hâr,
42,16      er sprach "nu sint mir mîniu jâr
42,17      nâch grôzer tumpheit bewant.
42,18      die gote heten mir gesant
42,19      einen küenen werden gast:
42,20      ist er verladen mit strîtes last,
42,21      sone mag ich nimmer werden wert.
42,22      waz touc mir schilt unde swert?
42,23      er sol mich schelten, swer michs mane."
42,24      kêrter von den sînen dane,
42,25      gein der porte er vaste ruorte.
42,26      ein knappe im widerfuorte
42,27      ein schilt, ûzen und innen dran
42,28      gemâlt als ein durchstochen man,
42,29      geworht in Isenhartes lant.
42,30      ein helm er fuorte ouch in der hant,
  [Zu Dreißiger 43]