Dreißiger-Abschnitt 100

[Zu Dreißiger 99]

100,1      "nu habt iuch an mîne phlege."       
100,2      si wîst in heinlîche wege.
100,3      sîner geste phlac man wol ze frumn,
100,4      swar halt ir wirt wære kumn.
100,5      daz gesinde wart gemeine:
100,6      doch fuor er dan al eine,
100,7      wan zwei junchêrrelîn.
100,8      juncfrouwen unt diu künegîn
100,9      in fuorten er freude vant
100,10      und al sîn trûren gar verswant.
100,11      entschumphiert wart sîn riwe
100,12      und sîn hôchgemüete al niwe:
100,13      daz muose iedoch liebe sîn.
100,14      frou Herzeloyd diu künegîn
100,15      ir magettuom âne wart.
100,16      die munde wâren ungespart:
100,17      die begunden si mit küssen zern
100,18      und dem jâmer von den freuden wern.
100,19         Dar nâch er eine zuht begienc:
100,20      si wurden ledic, dier vienc.
100,21      Hardîzen und Kaylet,
100,22      seht, die versuonde Gahmuret.
100,23      da ergienc ein sölhiu hôhgezît,
100,24      swer der hât gelîchet sît,
100,25      des hant iedoch gewaldes phlac.
100,26      Gahmuret sich des bewac,
100,27      sîn habe was vil ungespart.
100,28      aræbesch golt geteilet wart
100,29      armen rîtern al gemeine,
100,30      unt den küngen edel gesteine
  [Zu Dreißiger 101]