Dreißiger-Abschnitt 97

[Zu Dreißiger 96]

97,1      als ich mînem wîbe entran,       
97,2      die ich ouch mit rîterschaft gewan.
97,3      si mich ûf von strîte bant,
97,4      ich liez ir liute unde lant."
97,5      si sprach "hêr, nemt iu selbe ein zil:
97,6      ich lâz iu iwers willen vil."
97,7      "ich wil frumen noch vil der sper enzwei:
97,8      aller mânedglîch ein turnei,
97,9      des sult ir frouwe ruochen,
97,10      daz ich den müeze suochen."
97,11      diz lobte si, wart mir gesagt:
97,12      er enphienc diu lant unt och die magt.
97,13         Disiu driu junchêrrelîn
97,14      Ampflîsen der künegîn
97,15      hie stuonden, unde ir kappelân,
97,16      volge und urteil wart getân,
97,17      aldâ erz hôrte unde sach.
97,18      heinlîche er Gahmureten sprach.
97,19      "man tet mîner frouwen kunt
97,20      daz ir vor Pâtelamunt
97,21      den hœhsten prîs behieltet
97,22      unt zweir krône wieltet.
97,23      si hât ouch lant unde muot,
97,24      und gît iu lîp unde guot."
97,25         "dô si mir gap die rîterschaft,
97,26      muos ich nâch der ordens kraft,
97,27      als mir des schildes ambet sagt,
97,28      derbî belîben unverzagt.
97,29      wan daz ich schilt von ir gewan,
97,30      ez wær noch anders ungetân.
  [Zu Dreißiger 98]