Dreißiger-Abschnitt 673

[Zu Dreißiger 672]

673,1      Ir möht zeinr witwen wol tuon."       
673,2      Artûs sprach "dîner muomen suon
673,3      Gaherjêten si dort hât,
673,4      unt Gâreln der rîters tât
673,5      in manegem poynder worhte.
673,6      mir wart der unrevorhte
673,7      an mîner sîten genomn.
673,8      ein unser poynder was komn
673,9      mit hurte unz an ir barbigân.
673,10      hurtâ wiez wart getân
673,11      von dem werden Meljanz von Lîz!
673,12      undr eine baniere wîz
673,13      ist er hin ûf gevangen.
673,14      diu banier hât enpfangen
673,15      von zoble ein swarze strâle
673,16      mit herzen bluotes mâle
673,17      nâch mannes kumber gevar.
673,18      Lirivoyn rief al diu schar,
673,19      die under der durch strîten riten:
673,20      die hânt den prîs hin ûf erstriten.
673,21      mirst ouch mîn neve Jofreit
673,22      hin ûf gevangen: deist mir leit.
673,23      diu nâchhuot was gestern mîn:
673,24      von gedêch mir dirre pîn."
673,25         der künec sîns schaden vil verjach:
673,26      diu herzogîn mit zühten sprach
673,27      "hêrre, ich sage iuchs lasters buoz.
673,28      irn het mîn decheinen gruoz:
673,29      ir mugt mir schaden hân getân,
673,30      den ich doch ungedienet hân.
  [Zu Dreißiger 674]