Dreißiger-Abschnitt 751

[Zu Dreißiger 750]

751,1         Parzivâl hin zim sprach       
751,2      "ich pin ouch der in nie gesach.
751,3      man sagt mir guotiu werc von im
751,4      (an maneger stat ich diu vernim),
751,5      daz er wol kunde in strîten
751,6      sînen prîs gewîten
751,7      und werdekeit gemachen hôch.
751,8      elliu missewende in vlôch.
751,9      er was wîben undertân:
751,10      op die triwe kunden hân,
751,11      si lôndens âne valschen list.
751,12      von der touf noch gêret ist
751,13      pflager, triwe ân wenken:
751,14      er kunde ouch wol verkrenken
751,15      alle valschlîche tât:
751,16      herzen stæte im gap den rât.
751,17      daz ruochten si mich wizzen lân,
751,18      den kündec was der selbe man,
751,19      den ir gerne sæhet.
751,20      ich wæne ir prîses jæhet
751,21      im, ob er noch lebte,
751,22      wand er nâch prîse strebte.
751,23      sîn dienst twanc der wîbe lôn,
751,24      daz der künec Ipomidôn,
751,25      gein im tjostierens pflac.
751,26      diu tjost ergienc vor Baldac:
751,27      wart sîn werdeclîchez lebn
751,28      durh minne an den gegebn.
751,29      wir hânn ze rehter tjost verlorn,
751,30      von dem wir bêde sîn erborn."
  [Zu Dreißiger 752]