Dreißiger-Abschnitt 134

[Zu Dreißiger 133]

134,1      irn welt iuch einer site schamn:       
134,2      ir liezet küneginne namn
134,3      und heizt durch mich ein herzogin.
134,4      der kouf gît mir ungewin.
134,5      Mîn manheit ist doch quec,
134,6      daz iwer bruoder Erec,
134,7      mîn swâger, fil li roy Lac,
134,8      iuch wol dar umbe hazzen mac.
134,9      mich erkennet och der wîse
134,10      an bewantem prîse,
134,11      der ninder mag entêret sîn,
134,12      wan daz er mich vor Prurîn
134,13      mit sîner tjoste valte.
134,14      an im ich sît bezalte
134,15      hôhen prîs vor Karnant.
134,16      ze rehter tjost stach in mîn hant
134,17      hinderz ors durh fîanze:
134,18      durch sînen schilt mîn lanze
134,19      iwer kleinœte brâhte.
134,20      vil wênc ich gedâhte
134,21      iwerr minne eim anderm trûte,
134,22      mîn frouwe Jeschûte.
134,23         frouwe, ir sult gelouben des,
134,24      daz der stolze Gâlôes
134,25      fil li roy Gandîn
134,26      tôt lac von der tjoste mîn.
134,27      ir hielt ouch nâhen bî,
134,28      Plihopliherî
134,29      gein mir durch tjostieren reit
134,30      und mich sîn strîten niht vermeit.
  [Zu Dreißiger 135]