Dreißiger-Abschnitt 227

[Zu Dreißiger 226]

227,1      und hiez mich zuo ziu rîten în."
227,2      "hêrre, ir sult willekomen sîn.       
227,3      sît es der vischære verjach,
227,4      man biut iu êre unt gemach
227,5      durch in der iuch sande widr,"
227,6      sprach der knappe und lie die brükke nidr.
227,7         In die burc der küene reit,
227,8      ûf einen hof wît unde breit.
227,9      durch schimpf er niht zetretet was
227,10      (dâ stuont al kurz grüene gras:
227,11      was bûhurdiern vermiten),
227,12      mit baniern selten überriten,
227,13      alsô der anger z'Abenberc.
227,14      selten frœlîchiu werc
227,15      was gefrümt ze langer stunt:
227,16      in was wol herzen jâmer kunt.
227,17         wênc er des gein in enkalt.
227,18      in enpfiengen ritter jung unt alt.
227,19      vil kleiner junchêrrelîn
227,20      sprungen gein dem zoume sîn:
227,21      ieslîchez für dez ander greif.
227,22      si habten sînen stegreif:
227,23      sus muoser von dem orse stên.
227,24      in bâten ritter fürbaz gên:
227,25      die fuorten in an sîn gemach.
227,26      harte schiere daz geschach,
227,27      daz er mit zuht entwâpent wart.
227,28      si den jungen âne bart
227,29      gesâhen alsus minneclîch,
227,30      si jâhn, er wære sælden rîch.
  [Zu Dreißiger 228]