Dreißiger-Abschnitt 245

[Zu Dreißiger 244]

245,1         Parzivâl niht eine lac:       
245,2      geselleclîche unz an den tac
245,3      was im strengiu arbeit.
245,4      ir boten künftigiu leit
245,5      sanden im in slâfe dar,
245,6      daz der junge wol gevar
245,7      sîner muoter troum gar widerwac,
245,8      des si nâch Gahmurete pflac.
245,9      sus wart gesteppet im sîn troum
245,10      mit swertslegen umbe den soum,
245,11      dervor mit maneger tjoste rîch.
245,12      von rabbîne hurteclîch
245,13      er leit in slâfe etslîche nôt.
245,14      möhter drîzecstunt sîn tôt,
245,15      daz heter wachende ê gedolt:
245,16      sus teilt im ungemach den solt.
245,17         von disen strengen sachen
245,18      muos er durch nôt erwachen.
245,19      im switzten âdern unde bein.
245,20      der tag ouch durch diu venster schein.
245,21      sprach er "wê sint diu kint,
245,22      daz si hie vor mir niht sint?
245,23      wer sol mir bieten mîn gewant?"
245,24      sus wart ir der wîgant,
245,25      unz er anderstunt entslief.
245,26      nieman redete noch enrief:
245,27      si wâren gar verborgen.
245,28      umbe den mitten morgen
245,29      do erwachte aber der junge man:
245,30      ûf rihte sich der küene sân.
  [Zu Dreißiger 246]