Dreißiger-Abschnitt 352

[Zu Dreißiger 351]

352,1      Si vlizzen sich gein strîtes werc.       
352,2      Gâwân reit ûf an den berc.
352,3         swie wênec er wære bekant,
352,4      er reit ûf da er die burc vant.
352,5      sîn ougen muosen schouwen
352,6      mange werde frouwen.
352,7      diu wirtîn selbe komen was
352,8      durch warten ûf den palas
352,9      mit ir schœnen tohtern zwein,
352,10      von den vil liehter varwe schein.
352,11         schier het er von in vernomn,
352,12      si sprâchen "wer mac uns hie komn?"
352,13      sus sprach diu alte herzogîn.
352,14      "waz gezoges mac diz sîn?"
352,15      sprach ir elter tohter sân
352,16      "muoter, ez ist ein koufman."
352,17      "nu füert man im doch schilde mite."
352,18      "daz ist vil koufliute site."
352,19      ir junger tohter sprach
352,20      "du zîhst in daz doch nie geschach:
352,21      swester, des mahtu dich schamen:
352,22      er gewan nie koufmannes namen.
352,23      er ist minneclîch getân,
352,24      ich wil in zeime ritter hân.
352,25      sîn dienst mac hie lônes gern:
352,26      des wil ich in durch liebe wern."
352,27         sîne knappen nâmn goume
352,28      daz ein linde und ölboume
352,29      unden der mûre stuont.
352,30      daz dûhte si ein gæber fuont.
  [Zu Dreißiger 353]